【公司專訪】置富產業:逐步增體驗式商戶增商場吸引力

【Now財經台】置富產業信託(00778)周二(5日)收市後派咗中期成績表，上半年續租租金調升率仍錄得負增長，係咪意味最壞仍未過去？下半年有冇機會轉為正增長？海外收購方面又有咩部署？

置富產業信託行政總裁趙宇表示，上半年零售環境充滿挑戰，市民消費模式唔同咗，見到市場仍然係適應中，雖然續租租金調升率維持負數，幅度同2024年下半年差唔多，但集團致力維持高出租率，依家物業組合平均出租率達95%，續租率82%，停車場收入亦有所增加，有助抵銷部分收入跌幅。

Justina補充，置富產業主要管理本港民生商場，會因應附近人口變化同居民喜好，慢慢增加更多體驗式商戶，希望可以滿足社區嘅需求，提升商場吸引力，見到5月、6月商場人流及本港零售銷售總額開始出現正面變化，7月、8月更見到人流逐步恢復，所以對前景感到樂觀。

收購方面，Justina認為，今年係一個好時機，因為現時利息持續向下，借貸成本較低，有利集團進行收購及帶來正增長，集團之前曾收購新加坡物業，所以未來會繼續留意呢個市場。