【Now財經台】截至早上11時止，1小時內《彭博》用戶關注度上升最多股份，依次為泡泡瑪特(09992)、富衛集團(01828)、中升控股(00881)、布魯可(00325)及中國生物製藥(01177)。
IP概念股布魯可股價今日(19日)低開1.7%後，跌幅一度擴大至約9%，低見111元，蒸發晒昨日(18日)升幅，集團股價於6月及7月累跌逾20%，去到今個月仲未止跌，受制於20天線，集團周五(22日)就會出業績，但冇發過盈利相關消息，去年虧損仲擴大緊，今年上半年會唔會有改善，令市場重拾信心？
富途證券首席分析師譚智樂指，要成為強勢IP概念股，前提一定離唔開有盈利支持，同埋有自家設計IP，市場會用市盈率(PE)增長作為指標，但布魯可係以代理IP為主嘅模式，估計即將派發嘅成績表難有改善。
股價方面，Arnold認為，現階段最重要係守住100元水平呢條防線，一旦失「紅底股」，技術上可能會受頭肩頂形態影響，投資者需要小心。
