【now.com財經】IP股今年表現唔差，最強勢一定係近日啱啱出完業績，股價隨即破頂嘅泡泡瑪特(09992)，今年以嚟暫時累升逾2倍，其次係布魯可(00325)，暫時累升逾30%，但名創優品(09896)相對失色，今年暫時累跌逾1%，不過，名創股價今日(22日)爆升，一度炒高逾21%，高見47.54元。
名創昨日(21日)出咗半年業績，雖然少賺逾20%，但派多咗息，消息方面，集團旗下TOP TOY近期完成由新加坡淡馬錫(Temasek)領投嘅新一輪戰略融資，估值升至約100億元。此外，野村喺集團放榜後出報告，上調美股目標價、2025年至2027年收入及盈利預測，可能喺呢啲利好消息合力推升下，令名創股價今日咁強勢。
但值得留意係，野村都提及名創一個隱憂，就係對集團自營IP可唔可以成為下一個增長動力存疑，因為經營自營IP同經營第三方IP唔同。
