【Now財經台】截至早上11時止，1小時內《彭博》用戶搜尋量最多港股，依次為中國宏橋(01378)、地平線機器人(09660)、比亞迪股份(01211)、中芯國際(00981)及紫金礦業(02899)。
日前環球債市出現拋售潮，市場擔心政府債務影響經濟前景，繼而影響工業金屬需求。中國宏橋股價今日(4日)一度挫逾6%，低見23.45元。喺環球經濟前景不明朗下，資源股後市會點走？
紅蟻資本投資總監李澤銘指，銅價8月初跌落嚟之後，一直冇回升跡象，只係銅股本身有炒作，但純粹係資金推動，依家內地監管部門似乎想出手遏制過熱嘅投資情緒，呢類缺乏利好因素支持，但股價喺咁升嘅股份會有較大調整壓力。
Alan又話，喺一眾資源及金屬股中，鋁材股嘅基本因素支撐力較其他大，雖然提煉及加工嘅產能冇明顯增加，但需求仍然穩定，因為無論係電動車、光伏或電網，呢類建設會使用到大量鋁材。後市投資者要留意資源股嘅基本因素及內地監管部門嘅態度。
