【now.com財經】本港新股市場持續熾熱，港交所(00388)嘅IPO生意絕對唔憂做，高盛最新報告引述港交所管理層出席一個論壇時指，依家有逾200家企業籌備喺香港上市，數量已重返2021年8月高峰時期。至於散戶對抽新股嘅熱情亦冇減退。
內地摺疊單車龍頭，喺1982年創立嘅大行科工(Dahon，02534)公開招股已經喺今日(4日)中午截飛，綜合市場數據，暫時孖展認購額高逾2600億元，如果以公售額逾3900萬元計，超額認購逾6600倍，已超越今年1月掛牌嘅布魯可(00325)超購逾5990倍，率先成為今年新股「超購王」，更打破埋毛記葵涌(01716)當年創下嘅逾6200倍嘅紀錄，勢成史上新「超購王」。
集團今次擬發行逾790萬股H股，當中10%在港公開發售，發售價49.5元，集資近4億元，每手100股，入場費近5000元，股份預期下周二(9日)首日掛牌買賣。
