【Now財經台】專門為企業提供內部管理及客戶服務諮詢嘅Salesforce，行政總裁貝尼奧夫(Marc Benioff)透露，公司已裁減4000名客戶支援職位，工作都由其開發嘅人工智能(AI)客服系統「Agentforce」取代，認為AI可顯著提升營運效率。過去幾年Salesforce收入及盈利都有得升，但股價今年以來累跌20%，大幅跑輸大市。Salesforce今次用AI取代人手而裁員，對提升公司投資價值及挽回投資者信心有冇作用？
資深經濟師羅家聰指，AI取代人手係大勢所趨，對科技公司嚟講更加係常態，所以市場唔會對公司「加分」。佢又話，科企要提升自身價值，要諗辦法增加收益，唔係只壓低成本，否則，就同消費零售股冇分別，因此，如果想突圍而出，必須提高收入，繼而推高股東權益報酬率(ROE)，先可以令股價長升長有。
