【Now財經台】據《路透》報道，比亞迪股份(01211)下調今年銷量目標16%，由550萬架降至460萬架，集團暫時未有回應呢個傳聞，不過，比亞迪今年首8個月銷量約286萬架，只完成銷售目標約50%，今次下調全年目標係咪都唔意外？
艾德金融執行董事陳政深指，比亞迪下調全年銷售目標嘅做法實際，如果以原來銷售目標計，今年餘下時間平均每個月要賣逾60萬部車先可以達標，睇返過去幾個月，銷量只係介乎40萬至45萬架，即使年底可能有促銷活動，但呢啲促銷會唔會受「反內捲」指引影響仍然係未知數，喺市場低迷下，比亞迪下調銷售目標係合理及務實。
Ryan認為，比亞迪海外市場增長空間相對樂觀，集團已進軍112個國家及地區，部分市場更超越Tesla，已經喺歐洲站穩陣脚。不過，內地唔少同業已經喺歐洲有成熟供應鏈，德國、南韓等車企亦想分一杯羹，喺競爭愈嚟愈激烈之下，勢令比亞迪歐洲市場擴展步伐減慢。
