【Now財經台】內地折疊單車龍頭大行科工(Dahon，02543)公開招股已經喺今日(4日)中午截飛，認購反應非常熱烈，累計借出2621億元孖展，以公售集資3920萬元計，超額認購逾6600倍，不單超越年初掛牌，超購5998倍嘅布魯可(00325)，率先成為今年新股「超購王」，更打破當年超購6288倍嘅毛記葵涌(01716)紀錄，勢成史上「新超購王」。大行科工將會喺下周二(9日)首掛，點預測首日表現？
耀才證券研究部總監植耀輝指，如果以近日新股市場嘅熾熱程度睇，由於大行科工市值唔大，規模又相對細，所以首掛狂飆嘅機會較高。但值得留意係，如果睇返集團業務狀況，同埋發行股數，吸引力就麻麻。
Stanley又話，其實大行科工超購倍數高都預咗，但破晒紀錄成史上「新超購王」就係意外收穫。
