【now.com財經】蘋果公司(Apple Inc.)將會喺本港時間周三(10日)凌晨1點，舉行名為「Awe Dropping」嘅秋季發布會，最矚目一定係iPhone 17系列，當中又以「新成員」iPhone 17 Air最受關注，不過，有「最強蘋果記者」之稱，《彭博》科技記者Mark Gurman罕有潑冷水，預言iPhone 17 Air「冇乜人買」。
Mark Gurman認為，iPhone 17 Air「唔賣得」有幾個原因:
1.機身只有5.5至6mm，可能係史上最薄iPhone，但就會犧牲電池續航力，電池容量可能只得3000mAh。
2.鏡頭走回頭路，用返單鏡頭模組，冇咗廣角及望遠，連擴音喇叭都只得1個。
3.售價尷尬，會明顯貴過iPhone 17，但只平過相機、性能等強好多嘅iPhone 17 Pro幾百美元。
佢又認為，今時今日「輕」對好多人嚟講，根本唔係賣點，三星(Samsung)都曾經出過一部Galazy S25 Edge，一樣係sell「輕」及「薄」，但結果都唔可以成為熱賣機款。
