【Now財經台】深圳宣布放寬樓市限購，力度更比上海、北京等地大，內房股延續升勢。不過，好多隻內房都未重返去年9月底內地監管部門出「組合拳」時水平，只有華潤置地(01109)可以突破去年高位，內房股中，潤地係最好選擇？
天風國際李偉傑指，中長線可以揀較穩陣潤地及中國海外發展(00688)，投機性為主、追求政策出台後短期升幅嘅投資者就可以留意碧桂園(02007)等有債務問題嘅內房股。長遠嚟講，潤地及中海外會更受惠得到，因為佢哋嗰餅會愈做愈大，內房兩極化將會更明顯。
Jason又話，潤地及中海外可持續度高，係相對安全嘅選擇。市場憂慮碧桂園嘅可持續性，以及債務能否全部成功債轉股，若能成功債轉股，令股數膨脹，碧桂園隨時可以變返過千億市值。佢建議，投資者可以小注博有債務問題嘅內房股，作中長線部署。
