【now.com財經】比亞迪股份(01211)AH股今年表現唔算突出，H股暫時累升唔夠20%，A股就累升約10%，其中，H股過去1個月更累跌近5%，據集團最新公布，近日多名管理層及核心人員出手增持A股，合共涉資逾5000萬人仔，唔知係咪想幫手撐價。
比亞迪兩名高級副總裁、高級副總裁兼財務總監、兩名副總裁，分別喺9月1日至9月9日期間，合共斥資逾2300萬人仔，增持公司A股。此外，另有32名公司核心人員，合共斥資2800萬人仔，增持公司A股。
除咗股價今年表現一般，比亞迪今年賣車成績亦麻麻，上半年銷售相對全年目標，完成唔到40%，下半年銷售壓力絕對唔細，早前，據《路透》報道，比亞迪下調咗全年銷售目標16%。
此外，集團今年以來亦有唔少惹人關注嘅「小風波」，包括曾被長城汽車(02333)高層暗指是「汽車業恒大」，比亞迪即刻反擊，話唔存在「車圈恒大」，去到年中因發動減價戰，遭官媒發文批評。
