【Now財經台】蔚來(09866)喺6個月內第2度「抽水」，消息令蔚來股價今日(11日)反覆向下，一度跌4%，低見44.76元，跌穿20天線。內地多個部門最新出手整治汽車網絡宣傳，打擊「網絡水軍」，措施係咪對蔚來前景有利？對股價有冇幫助？
耀才證券研究部總監植耀輝指，唔止蔚來，其他車企都可以受惠，估計整個行業受惠程度都差唔多，但對蔚來嘅幫唔會太顯著。佢又指，行業發展會更健康，但唔會刺激到車企銷量，最終仍要視乎汽車本身嘅吸引力。
Stanley又話，對蔚來股價有保留，始終業績表現仍令市場擔心，雖然集團過去2個月銷量唔錯，但同其他車企比較似乎冇太大亮點。佢續指，雖然蔚來今次配股冇令股價大跌，但公司未來仍面對唔少挑戰，股價走勢唔樂觀，佢建議，冇貨嘅投資者可以再等等。
