【Now財經台】市傳阿里巴巴(09988)、百度集團(09888)開始用自研晶片train人工智能(AI)模型，局部取代英偉達(Nvidia)嘅AI晶片。雖然阿里及百度距離完全唔用Nvidia嘅AI晶片，可能仲有一段時間，但市場係咪可以憧憬全面棄用呢個因素，除繼續支持阿里股價外，亦可繼續吸引資金追入AI建設投資主題？
博威環球證券金融首席分析師聶振邦指，大型科技公司自行研發晶片係大勢所趨，唔止內地科技公司，美國大型科技公司都有意自行研發晶片。長遠嚟講，自研晶片可以掌握技術層面，亦可有效控制成本，議價能力會更強。佢又估計，咗百度及阿里外，唔排除騰訊控股(00700)都會積極研發晶片。
聶Sir又話，阿里近期有唔少利好消息，包括淘寶閃購、「高德掃街榜」，以及自行研發晶片等，昨日(11日)更帶領晶片股集體向上，如果呢啲消息持續發酵，估計半導體板塊可繼續睇高一線，對阿里股價亦有幫助，後市要留意阿里股價可唔可以突破160元阻力。
