【Now財經台】截至早上11時止，1小時內《彭博》用戶搜尋量最多港股，依次為紫金礦業(02899)、英皇國際(00163)、美圖公司(01357)、協鑫科技(03800)及美團(03690)。
紫金冇乜新消息，金價、銅價亦未見起色，但紫金股價今朝(18日)愈升愈有，係表現最強勢藍籌。不過，美國昨晚(17日)公布嘅經濟數據唔錯，加上內地最新經濟數據大致好過預期，令金屬價格回穩。睇返資源股，以金屬股表現較搶鏡，加上紫金本周初發盈喜，股價本周暫時累升5%，喺金價橫行下，上望空間仲有幾大？
大華繼顯執行董事梁偉源指，隨著美國關稅逐步落實，金融市場回復平穩，各國央行近期積極買入黃金，令金價有支持，雖然最近金市較淡靜，但好快就到業績期，估計會有資金炒作業績股。
Steven又話，金價大升機會唔大，亦要視乎美國下半年減息步伐，同埋各國央行增持黃金嘅態度，加上紫金盈喜消息已反映喺股價上，除非金價突破每盎司3400至3500美元，否則，紫金股價上望空間唔多。
