【Now財經台】截至早上11時止，1小時內《彭博》用戶搜尋量最多港股，依次為長城汽車(02333)、華虹半導體(01347)、泡泡瑪特(09992)、閱文集團(00772)及中國宏橋(01378)。
長汽上周末宣布巴西工廠正式投產，全面啟動生產線，估計初期每年生產3萬輛車，至2028年有望年產5萬輛車，但對比整個集團過百萬嘅年產量，巴西工廠年產量似乎太少，不過，公司今年初撤出歐洲市場，依家巴西廠投產，令海外市場布局再明朗化，長汽係咪值得憧憬？
富昌證券聯席董事譚朗蔚指，市場對呢個消息反應好大，主要係睇好長汽喺內地以外地方建廠，減低中美貿易戰影響，有望降低成本，雖然暫時產量唔多，但可以話係踏出第一步，亦可以向市場展示公司發展方向，令市場信心增加，加上美國跟金磚國家關係較友好，相對喺政治上冇咁多阻濟。
不過，佢提醒，要再留意設廠後對整體業績嘅幫助，但股份依家嘅相對強弱指數(RSI)已達超買水平，手上有貨嘅投資者，要先搵位食糊離場，如果仍睇好長汽，不妨靜待股價回落至約15元再考慮入手。
