【Now財經台】特朗普(Donald Trump)政府擬加強審查及限制中國原創新藥進入市場，消息拖累恒生指數今日(11日)低開逾200點，一開市就失守26000關，之後最多跌逾320點，低見25878點，不過，今日跌市重災區之一嘅創新藥股有資金撈底，加上阿里巴巴(09988)倒升，大市跌幅收窄，收市跌113點，報26086點，今日仍收到陽燭兼企喺26000點樓上，連續兩日收市企喺26000點以上。
成交方面，全日成交金額逾3252億元，北水趁跌市大舉撈貨，今日淨流入逾190億元，而恒指走勢亦未明顯轉差，仍然係一個反覆向上尋頂嘅格局。
