【Now財經台】市傳蘋果公司(Apple Inc.)下月發布嘅3款iPhone 17將會加價5%，可能同Apple加碼投資1000億美元喺美國製造業，轉移更多生產線返去推高成本有關，相信都無可避免會轉嫁畀消費者，最終係咪會犧牲iPhone銷量？
耀才證券研究部總監植耀輝指，iPhone 17系列可能每部加價50美元，折合約400港元，呢啲係有機會轉嫁畀消費者，但由於「果粉」對Apple嘅忠誠度高，所以未必會因為加價而「轉會」，佢又指，要留意iPhone 17喺功能方面有冇大突破。
另一方面，Apple加碼投資美國，好大機會獲美國總統特朗普(Donald Trump)「放生」，Apple產品有望獲關稅豁免，刺激港股嘅Apple概念股大升，其中，高偉電子(01415)一度飆13%，高見30.8元，Stanley表示，升勢反映市場對iPhone 17嘅憧憬，不過，建議冇貨嘅投資者，不妨等呢啲Apple概念股放榜後再做部署。
